– जुन्या आठवणींना उजाळा देताना मन झाले भावूक.
– ५० वर्षांहून अधिक काळ ज्ञानदान करणाऱ्या शाळेची दुरवस्था पाहून विद्यार्थ्यांच्या मनात हळहळ.
गौतम नगरी चौफेर बादल बेले राजुरा, दि.१ ऑक्टोबर महाराष्ट्र शिक्षण प्रसारक मंडळ, बल्लारपूरद्वारे संचालित सास्ती येथील सर्वोदय विद्यालयाला माजी विद्यार्थ्यांनी भेट देत शाळेतील जुन्या आठवणींना उजाळा दिला. मात्र, ज्या शाळेने आयुष्याला दिशा दिली, शिक्षणाचे संस्कार केले आणि जीवनाचा पाया घातला, त्याच शाळेची आजची अवस्था पाहून माजी विद्यार्थ्यांचे मन हेलावून गेले. कधीकाळी विद्यार्थ्यांच्या गजबजाटाने आणि शिक्षकांच्या मार्गदर्शनाने चैतन्याने भरलेली ही शाळा आज बंद अवस्थेत असल्याचे चित्र पाहून अनेकांच्या डोळ्यांत आठवणी दाटून आल्या. सन १९७१-७२ मध्ये सुरू झालेल्या या सर्वोदय विद्यालयाने पाच दशकांहून अधिक काळ परिसरातील विद्यार्थ्यांना शिक्षणाचे धडे दिले. सास्ती व परिसरातील अनेक गावांतील विद्यार्थ्यांसाठी ही शाळा शिक्षणाचे महत्त्वाचे केंद्र होती. याच शाळेतून शिक्षण घेऊन अनेक विद्यार्थी विविध क्षेत्रांत स्थिरावले. शाळेच्या वर्गखोल्या, मैदान, शिक्षकांचे मार्गदर्शन, मित्रांसोबत घालवलेले दिवस, शाळेतील खोड्या, स्नेहसंमेलने आणि परीक्षेच्या काळातील धावपळ अशा असंख्य आठवणी आजही माजी विद्यार्थ्यांच्या मनात ताज्या आहेत.
मात्र, कालांतराने विद्यार्थ्यांची संख्या कमी होत गेल्याने अखेर या विद्यालयाला टाळे लागले.
ज्या शाळेच्या परिसरात कधीकाळी विद्यार्थ्यांचा किलबिलाट ऐकू येत होता, तेथे आज शांतता पसरली आहे. शाळेची ही अवस्था पाहताना माजी विद्यार्थ्यांना आपल्या बालपणातील दिवसांची आठवण झाली. शाळेच्या प्रत्येक कोपऱ्याशी जोडलेल्या आठवणींना उजाळा देताना काही काळ सर्वजण जुन्या दिवसांत रमले. वयाची साठी ओलांडल्यानंतर पुन्हा एकदा आपल्या शाळेत एकत्र येण्याचा योग आल्याने माजी विद्यार्थ्यांसाठी हा भेटीचा क्षण विशेष ठरला. आयुष्याच्या प्रवासात प्रत्येकजण वेगवेगळ्या ठिकाणी पोहोचला, संसारात रमला; मात्र शाळेने दिलेली मैत्री आणि संस्कार यांची नाळ आजही कायम असल्याचे या भेटीतून दिसून आले. एकमेकांची विचारपूस, जुन्या आठवणींची देवाणघेवाण आणि शाळेतील आठवणींना उजाळा देत या माजी विद्यार्थ्यांनी भावनिक क्षण अनुभवले. शाळा म्हणजे केवळ चार भिंती आणि वर्गखोल्या नसतात, तर ती अनेक पिढ्यांच्या आयुष्याचा पाया असते. शिक्षकांनी दिलेले संस्कार, मित्रांनी दिलेली साथ आणि शाळेच्या परिसरात घडलेले बालपण आयुष्यभर स्मरणात राहते. त्यामुळेच आपल्या शाळेची आजची अवस्था पाहून माजी विद्यार्थ्यांच्या मनात हळहळ व्यक्त झाली. काळाच्या ओघात शाळा बंद पडली असली, तरी या विद्यालयाने घडविलेल्या विद्यार्थ्यांच्या मनात तिचे स्थान आजही अढळ असल्याचे या भेटीने अधोरेखित केले.
