विचारशीलतेचा गृहप्रवेश

डॉ.प्रा. रेणुकादास उबाळे यांच्या कल्पनेतून

गौतम नगरी चौफेर संजीव भांबोरे भंडारा – तुमसर नगरीतील डॉ. प्रा. रेणुकादास उबाळे आणि डॉ. सौ. निकिता रेणुकादास उबाळे यांच्या गृहप्रवेश सोहळ्याने परंपरेला नवा आयाम दिला आहे. सामाजिक बांधिलकी आणि विचारशीलतेचा संगम असलेल्या या सोहळ्याने अनेकांच्या मनात आदर आणि प्रेरणा निर्माण केली आहे.

– विचारशीलतेचा गृहप्रवेश-

उबाळे दांपत्याने आपल्या नवीन घरात पारंपरिक धार्मिक विधींपेक्षा सामाजिक आणि बौद्धिक मूल्यांना प्राधान्य दिले. गृहप्रवेशाच्या वेळी त्यांनी भारताचे संविधान, जगद्गुरु तुकोबारायांचे अभंग, राष्ट्रसंत तुकडोजी महाराज यांची ग्रामगीता, शिवचरित्र, लोकशाहीर अण्णाभाऊ साठे यांचे साहित्य आणि इतर प्रेरणादायी ग्रंथांची पूजा-अर्चना केली. महामानवांना अभिवादन करून त्यांनी आपल्या नव्या वास्तूला सामाजिक मूल्यांची आधारशिला दिली.

… कार्यक्रमाची वैशिष्ट्ये…

कॉ. रमेश बिजेकर यांनी गृहप्रवेशाची भूमिका विषद करताना महात्मा ज्योतिबा फुले यांच्या कार्याची सांगड घालून या समाजाभिमुख उपक्रमाची प्रशंसा केली.

मराठा सेवा संघाचे विदर्भ अध्यक्ष शिवश्री अनिल भुसारी यांनी निवडक ग्रंथांचे वाचन करून उपस्थितांना बौद्धिक अमृत पाजले.

कार्यक्रमाचे संचालन अखिल भारतीय अंधश्रद्धा निर्मूलन समितीचे तुमसर तालुका संघटक राहुल डोंगरे यांनी केले.

गृहबांधणीमध्ये सहकार्य केलेल्या सर्व श्रमिकांचा, अभियंता, सुतार , पेंटर आदींचा पुष्पगुच्छ आणि भेटवस्तू देऊन सत्कार करण्यात आला.

डॉ. प्रा. रेणुकादास उबाळे आणि डॉ. निकिता शिंदे-उबाळे यांनी सर्वांचे ऋण मान्य करत आभार व्यक्त केले.

– समाजासाठी प्रेरणादायी पाऊल –

या गृहप्रवेश सोहळ्याने परंपरेला छेद देत समाजाभिमुखतेचा नवा आदर्श निर्माण केला आहे. तुमसर नगरीत या उपक्रमाला सकारात्मक प्रतिसाद मिळाला असून, भविष्यातील गृहप्रवेश सोहळ्यांसाठी हे एक प्रेरणादायी उदाहरण ठरू शकते. हे विशेष.